Ինչպես է կատարվում բիոպսիան
Բիոպսիան ամբուլատոր կարգով իրականացվող միջամտություն է, հատուկ նախապատրաստում չի պահանջում: Նախապես զգուշացրեք բժշկին, եթե ընդունում եք հակամակարդիչներ (արյունը նոսրացնող դեղորայք):
ՈՒՁՀ ուղղորդմամբ բարակ ասեղային ասպիրացիոն բիոպսիան նվազագույն ինվազիվ (ներթափանցող) միջամտություն է, որի ժամանակ բուժառուն արթուն է լինում: Բժիշկը նախ հականեխիչ նյութով մշակում է պարանոցը, այնուհետև ներարկում է տեղային անզգայացնող նյութ:
Ուլտրաձայնային հետազոտության սարքի օգնությամբ ինտերվենցիոն ռադիոլոգը տեղորոշում է հանգույցը, որպեսզի ասեղը մաշկի միջով ներմուծի հանգույցի մեջ: Օգտագործվում է շատ բարակ ասեղ, որն անգամ ավելի բարակ է երակից արյան նմուշ վերցնելիս օգտագործվող ասեղներից: Բժիշկը կխնդրի, որպեսզի բուն միջամտության պահին չխոսեք, խոսափեք հազալուց, կուլ տալուց և մնաք անշարժ: Նմուշը վերցնելուց հետո այն ուղարկում են լաբորատորիա՝ հետազոտության:
Բիոպսիան ցավոտ միջամտություն չէ: Ուլտրաձայնային հետազոտության զոնդից (զննաձող) հնարավոր է սեղմող զգացում ունենալ կամ թեթև անհանգստություն զգալ՝ ասեղի ներթափանցան պահին:
Բիոպսիայի միջամտությունը տևում է 5-10 րոպե: Ասեղի ներմուծման հատվածում տեղադրվում է փոքրիկ վիրակապ: Բուժառուն հանգիստ վերադառնում է իր առօրյային:
Խորհուրդ չի տրվում անմիջապես հետո կատարել ծանր ֆիզիկական աշխատանք: Ցավոտության դեպքում կարելի է ասեղի ներթափանցման հատվածում կիրառել սառույց կամ ընդունել ցավազրկող դեղորայք:
Կարդացեք հաջորդիվ՝
