Ինչու է կատարվում բիոպսիան
Բիոպսիան որև օրգանից կամ հյուսվածքից նմուշ վերցնելու միջամտություն է, որն այնուհետև ուղարկվում է լաբորատորիա՝ մանրակրկիտ ուսումնասիրության: Բիոպսիան ուսումնասիրվող նյութի վերաբերյալ տեղեկություն է տալիս, ինչի հիման վրա բժիշկն ախտորոշում է դնում: Առանց ճշգրիտ ախտորոշման հնարավոր չէ իրականացնել արդյունավետ բուժում:
Վահանաձև գեղձի հանգույցից նմուշառումը կոչվում է ՈւՁՀ ուղղորդմամբ բարակ ասեղային ասպիրացիոն բիոպսիա (ԲԱԱԲ): Իսկ ինչու՞ ՈւՁՀ ուղղորդմամբ՝ որովհետև նմուշը վերցնելիս բժիշկն առաջնորդվում է ուլտրաձայնային հետազոտության սարքի պատկերներով, որպեսզի ասեղը ճիշտ տեղակայի և հետևի նմուշի ասպիրացիայի (արտածծում) ընթացքին:
Հիշե՛ք, որ կույր բիոպսիաներն անընդունելի են: Այսինքն առանց ՈւՁՀ հսկողության չի իրականացվում բիոպսիա:
Վահանաձև գեղձի հանգույցների բարակ ասեղային ասպիրացիոն բիոպսիան իրականացվում է երբ
- ուլտրաձայնային հետազոտության ժամանակ հանգույցը ցուցադրում է կասկածելի բնութագրեր
- հանգույցը մեծ է 5 մմ-ից և բուժառուն ունի քաղցկեղի վտանգի գործոններ
- հանգույցը չափերի և/կամ տեղակայման պատճառով առաջացնում է կոսմետիկ դեֆեկտ, ճնշող ախտանիշներ և բուժառուն ցանկանում է հանգույցի բուժական միջամտության դիմել
Վահանաձև գեղձի հանգույցների շատ քիչ տոկոսն է չարորակ լինում, բայց շատ կարևոր է քաղցկեղի վաղ հայտնաբերումը, այդ պատճառով եթե ունեք ցուցում, ապա բիոպսիան հետաձգել չարժե: Որևէ տեսակի բուժական միջամտությունից առաջ ևս կարևոր է ունենալ բիոպսիայի եզրակացություն:
Որոնք են ԲԱԱԲ-ի առավելությունները
ՈւՁՀ ուղղորդմամբ բարակ ասեղային ասպիրացիոն բիոպսիայի գլխավոր առավելությունը միջամտության նվազագույն ինվազիվ և հետևաբար՝ անվտանգ լինելն է: Ամենակարևորն այն է, որ ԲԱԱԲ-ն թույլ է տալիս ճիշտ ախտորոշում կազմել, իսկ բուժման հաջողությունը հիմնված է ճշգրիտ ախտորոշման վրա: