Ինչ է վահանաձև գեղձը
Որն է վահանաձև գեղձի ֆունկցիան
Վահանաձև գեղձը թիթեռնիկաձև օրգան է, որը տեղակայված է պարանոցի առաջային մասում, կազմված է աջ և ձախ բլթերից: Այն ներզատիչ գեղձ է, որի գլխավոր ֆունկցիան օրգանիզմի նյութափոխանակությունը կարգավորող հորմոնների արտադրությունն է:
Վահանաձև գեղձի լավ գործունեության համար կարևոր է սննդի միջոցով ստանալ յոդի բավարար քանակ: Վահանաձև գեղձի բջիջներն օգտագործում են յոդը, որպեսզի արտադրեն հորմոններ, որոնք կոչվում են թիրոիդ հորմոններ, այսինքն՝ վահանաձև գեղձի հորմոններ: Սրանք են թիրոքսինը (T4) և տրիյոդթիրոնինը (T3):
Հորմոնների արտադրման և սինթեզման գործընթացը կարգավորվում է Հիպոֆիզի (գեղձ գլխուղեղում) կողմից: Վերջինս արտադրում է թիրոիդ խթանող հորմոն (TSH), որն էլ հրահանգում է վահանաձև գեղձին, թե ինչ քանակով թիրոիդ հորմոններ պետք է այն արտադրի օրգանիզմի պահանջները բավարարելու համար: Այդ պատճառով էլ, կախված մեր օրգանիզմի կարիքներից, TSH հորմոնի մակարդակն արյան մեջ տատանվում է: Բնականոն պայմաններում վահանաձև գեղձն արտադրում է հորմոններ հենց այն քանակությամբ, որը բավարար է մեր օրգանիզմի նյութափոխանակության գործընթացներն իրականացնելու համար: Երբ վահանաձև գեղձի ֆունկցիան խաթարվում է, այն սկսում է ավելցուկային կամ անբավարար քանակի հորմոններ արտադրել, ինչը համարվում է խանգարում:
Տարատեսակ գործոններ կան, որոնք հանգեցնում են վահանաձև գեղձի հիվանդությունների զարգացման: Ֆունկցիոնալ խանգարումների պատճառ կարող են լինել բորբոքային վիճակները՝ թիրեոիդիտները, գերակտիվ հանգույցը, ինչպես նաև սննդակարգը: Մեծ է նաև ժառանգականության դերը:
Ինչու է կարևոր վահանաձև գեղձը
Վահանաձև գեղձի գործունեությունից է կախված մեր ընդհանուր առողջական վիճակը, քանի որ հենց այս գեղձն է պատասխանատու կենսական նշանակության օրգանների աշխատանքի համար՝
- շնչառություն
- սրտի աշխատանք
- ծայրամասային և կենտրոնական նյարդային համակարգ
- մարմնի զանգված
- մկանային ուժ
- դաշտանային ցիկլ
- մարմնի ջերմաստիճան
- խոլեստերինի մակարդակ
- նյութափոխանակություն
Կարդացեք հաջորդիվ՝